@
О достосла́внии и всеблаже́ннии уго́дницы Бо́жии, вси святи́и в земли́ Черка́сстей ди́вно просия́вшии! Предстоя́ще Престо́лу Пресвяты́я и Живонача́льныя Тро́ицы, призри́те на нас и на всех люде́й, к заступле́нию ва́шему прибега́ющих. Услы́шите нас, чту́щих святу́ю па́мять ва́шу и моля́щихся вам. Возови́те, возде́вше ру́це ва́ша ко Го́споду, да ми́ром благослови́т страну́ на́шу и ниспошле́т благоде́нствие наро́ду на́шему многострада́льному, да защити́т Це́рковь от гоне́ний, да соблюде́т ю от раско́лов лука́вых и е́ресей ги́бельных! Моли́те Многоми́лостиваго Бо́га, да сохрани́т вся гра́ды и ве́си земли́ на́шея и лю́ди, в них живу́щия, от гла́да, губи́тельства, от огня́ и меча́, от междоусо́бныя бра́ни и наше́ствия иноплеме́нных, от тру́са и пото́па, от зно́я и мра́за, от смертоно́сныя ра́ны, пове́трий боле́зненных и от вся́каго зла.
Ей, досточу́днии Бо́жии уго́дники, предста́тельством ва́шим богоприя́тным Го́спода умоли́те, да да́рует нам ти́хое и безмо́лвное житие́ во вся́ком благоче́стии и чистоте́, неду́гов духо́вных и теле́сных изба́вит, подаю́ще вся, я́же ко спасе́нию потре́бная.
В час после́дний наш покая́нием, моли́твами ва́шими, богоблаже́ннии, па́че сне́га да убели́т Христо́с от грехо́в те́мныя ду́ши на́ша, одесну́ю стоя́ния с ва́ми и со все́ми святы́ми сподобля́юще нас, и сподо́бит сла́ву при́сно возсыла́ти Отцу́ и Сы́ну и Свято́му Ду́ху во ве́ки веко́в. Ами́нь.