i
Форма : VpSedm2PtVandM1vsednev(396)

^

^

^

html

@

16 Марта 2024 года, Пятница, (А348,B37), Глас 1. Последование великого повечерия в пятницу (И́же во святы́х отца́ на́шего Кири́лла, архиепи́скопа Иерусали́мскаго) * Шестопсалмие: * Псалом 4. * Псалом 6. * Псалом 12. * Псалом 24. * Псалом 30. * Псалом 90. * Тропари, глас 2: * за упокой, глас 2: * Молитва Великаго Василия: * И абие: * Псалом 50. * Псалом 101. * Молитва Манассии, царя иудейска: * Тропари, глас 6: * Псалом 69. * Псалом 142. * Канон: * Песнь 1: * Песнь 3: * Седален святи́теля Кири́лла, Глас 8: * Песнь 4: * Песнь 5: * Песнь 6: * Кондак святи́теля Кири́лла, Глас 4: * Песнь 7: * Песнь 8: * Песнь 9: * Песнопения святи́теля Кири́лла * Достойно есть: * Кондак, глас 8: * Молитва: * Молитва ко Господу нашему Иисусу Христу, Антиоха монаха Панде́кта: * Молитва иная, святаго Иоанникия: * Полезная информация о памяти святи́теля Кири́лла

29 марта 2024 по н. ст.

Ссылка на оригинал - https://cerkva.ck.ua/glas/showSlugba?id=23337&dayId=30513

16 Марта 2024 года, Пятница, (А348,B37), Глас 1. Последование великого повечерия в пятницу (И́же во святы́х отца́ на́шего Кири́лла, архиепи́скопа Иерусали́мскаго)

Священник:
Благослове́н Бог наш всегда́, ны́не и при́сно и во ве́ки веко́в.
Чтец:
Ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, помилуй нас.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник:
Я́ко Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Чтец:
Ами́нь.
Го́споди, поми́луй.
(12 раз.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Шестопсалмие:

Псалом 4.

Внегда́ призва́ти ми, услы́ша мя Бог пра́вды моея́, в ско́рби распространи́л мя еси́, уще́дри мя и услы́ши моли́тву мою. Сы́нове челове́честии, доко́ле тяжкосе́рдии? Вску́ю лю́бите суету́ и и́щете лжи? И уве́дите, я́ко удиви́ Госпо́дь преподо́бнаго Своего́: Госпо́дь услы́шит мя, внегда́ воззва́ти ми к Нему. Гне́вайтеся, и не согреша́йте, я́же глаго́лете в сердца́х ва́ших, на ло́жах ваших умили́теся. Пожрите же́ртву пра́вды и упова́йте на Го́спода. Мно́зи глаго́лют: кто яви́т нам блага́я? Зна́менася на нас свет лица́ Твоего, Го́споди. Дал еси́ весе́лие в се́рдце мое́м: от плода́ пшени́цы, вина́ и еле́я своего умно́жишася. В ми́ре вку́пе усну́ и почи́ю, я́ко Ты, Го́споди, еди́наго на упова́нии всели́л мя еси́.

Псалом 6.

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Поми́луй мя, Го́споди, я́ко не́мощен есмь, исцели́ мя, Го́споди, я́ко смято́шася ко́сти моя. И душа́ моя смяте́ся зело́: и Ты, Го́споди, доко́ле? Обрати́ся, Го́споди, изба́ви ду́шу мою: спаси́ мя ради ми́лости Твоея́. Я́ко не́сть в сме́рти помина́яй Тебе: во а́де же кто испове́стся Тебе? Утруди́хся воздыха́нием моим, измы́ю на вся́ку нощь ло́же мое, слеза́ми мои́ми посте́лю мою омочу́. Смяте́ся от я́рости о́ко мое, обетша́х во всех вразе́х моих. Отступи́те от Мене́, вси де́лающии беззако́ние, я́ко услы́ша Госпо́дь глас пла́ча моего́: услы́ша Госпо́дь моле́ние мое, Госпо́дь моли́тву мою прия́т. Да постыдя́тся и смяту́тся вси врази́ мои, да возвратя́тся и устыдя́тся зело́ вско́ре.

Псалом 12.

Доко́ле, Го́споди, забу́деши мя до конца́? Доко́ле отвраща́еши лице́ Твое от Мене́? Доко́ле положу́ сове́ты в души́ моей, боле́зни в се́рдце моем день и нощь? Доко́ле вознесе́тся враг мой на мя? При́зри, услы́ши мя, Го́споди, Бо́же мой, просвети́ о́чи мои, да не когда́ усну́ в смерть, да не когда́ рече́т враг мой: укрепи́хся на него. Стужа́ющии ми возрадуются, а́ще подви́жуся. Аз же на ми́лость Твою упова́х. Возра́дуется се́рдце мое о спасе́нии Твоем, воспою́ Го́сподеви, благоде́явшему мне, и пою́ и́мени Го́спода Вышняго.
При́зри, услы́ши мя, Го́споди, Бо́же мой, просвети́ о́чи мои, да не когда́ усну́ в смерть, да не когда́ рече́т враг мой: укрепи́хся на него.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же.
(Трижды.)
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 24.

К Тебе́, Го́споди, воздвиго́х ду́шу мою, Бо́же мо́й, на Тя упова́х, да не постыжу́ся во век, ниже́ да посмею́т ми ся врази́ мои, и́бо вси терпя́щии Тя не постыдя́тся. Да постыдя́тся беззако́ннующии вотще́. Пути́ Твоя, Го́споди, скажи́ ми, и стезя́м Твоим научи́ мя. Наста́ви мя на и́стину Твою, и научи́ мя, я́ко Ты еси́ Бог Спас мо́й, и Тебе терпе́х весь день. Помяни́ щедро́ты Твоя, Го́споди, и ми́лости Твоя, яко от ве́ка суть. Грех ю́ности моея́, и неве́дения моего не помяни́, по ми́лости Твое́й помяни́ мя Ты, ра́ди бла́гости Твоея́, Го́споди. Благ и прав Госпо́дь, сего́ ради законоположи́т согреша́ющим на пути́. Наста́вит кро́ткия на суд, научи́т кро́ткия путе́м Своим. Вси путие́ Госпо́дни ми́лость и и́стина, взыска́ющим заве́та Его́, и свиде́ния Его. Ра́ди и́мене Твоего́, Го́споди, и очи́сти грех мой, мног бо есть. Кто есть челове́к боя́йся Го́спода? Законоположи́т ему на пути́, его́же изво́ли. Душа́ его во благи́х водвори́тся, и се́мя его насле́дит зе́млю. Держа́ва Госпо́дь боя́щихся Его, и заве́т Его яви́т им. О́чи мои́ вы́ну ко Го́споду, я́ко Той исто́ргнет от се́ти но́зе мои. При́зри на мя и поми́луй мя, я́ко единоро́д и нищ есмь аз. Ско́рби се́рдца моего умно́жишася, от нужд моих изведи́ мя. Виждь смире́ние мое, и труд мой, и оста́ви вся грехи́ моя. Виждь враги́ моя, я́ко умно́жишася, и ненавиде́нием непра́ведным возненави́деша мя. Сохрани́ ду́шу мою, и изба́ви мя, да не постыжу́ся, я́ко упова́х на Тя. Незло́бивии и пра́вии прилепля́хуся мне, я́ко потерпе́х Тя, Го́споди. Изба́ви, Бо́же, Изра́иля от всех скорбе́й его.

Псалом 30.

На Тя, Го́споди, упова́х, да не постыжу́ся во век: пра́вдою Твое́ю изба́ви мя и изми́ мя. Приклони́ ко мне у́хо Твое́, ускори́ изъя́ти мя, бу́ди ми в Бо́га Защи́тителя, и в дом прибе́жища, е́же спасти́ мя. Я́ко держа́ва моя́ и прибе́жище мое́ еси́ Ты, и и́мене Твоего́ ра́ди наста́виши мя, и препита́еши мя. Изведе́ши мя от се́ти сея́, ю́же скры́ша ми, я́ко Ты еси́ Защи́титель мой, Го́споди. В ру́це Твои предложу́ дух мой: изба́вил мя еси́, Го́споди Бо́же и́стины. Возненавидел еси́ храня́щия суеты́ вотще́: аз же на Го́спода упова́х. Возра́дуюся и возвеселю́ся о ми́лости Твоей, я́ко призре́л еси́ на смире́ние мое́, спасл еси́ от нужд ду́шу мою, и не́си мене́ затвори́л в рука́х вра́жиих, поста́вил еси́ на простра́нне но́зе мои. Поми́луй мя, Го́споди, я́ко скорблю́: смяте́ся я́ростию о́ко мое́, душа́ моя и утро́ба моя. Я́ко исчезе́ в боле́зни живо́т мой и ле́та моя в воздыха́ниих, изнемо́же нището́ю кре́пость моя, и ко́сти моя смято́шася. От всех враг моих бых поноше́ние, и сосе́дом моим зело́, и страх зна́емым моим: ви́дящии мя вон бежа́ша от Мене́. Забве́н бых я́ко мертв от се́рдца, бых я́ко сосу́д погубле́н. Я́ко слы́шах гажде́ние мно́гих, живу́щих о́крест, внегда́ собра́тися им вку́пе на мя, прия́ти ду́шу мою совеща́ша. Аз же на Тя, Го́споди, упова́х, рех: Ты еси́ Бог мой. В руку́ Твое́ю жре́бии мои́: изба́ви мя из руки́ враг моих и от гоня́щих мя. Просвети́ лице́ Твое на раба́ Твоего, спаси́ мя ми́лостию Твоею. Го́споди, да не постыжу́ся, я́ко призва́х Тя: да постыдя́тся нечести́вии и сни́дут во ад. Не́мы да будут устны́ льсти́выя, глаго́лющия на пра́веднаго беззако́ние, горды́нею и уничиже́нием. Коль мно́гое мно́жество бла́гости Твоея, Го́споди, ю́же скрыл еси́ боя́щимся Тебе, соде́лал еси́ упова́ющим на Тя пред сы́ны челове́ческими. Скры́еши их в та́йне лица́ Твоего от мяте́жа челове́ческа, покры́еши их в кро́ве от пререка́ния язык. Благослове́н Госпо́дь, я́ко удиви́ ми́лость Свою во гра́де огражде́ния. Аз же Рех во изступле́нии моем: отве́ржен есмь от лица́ о́чию Твоею: сего́ ра́ди услы́шал еси́ глас моли́твы моея́, внегда́ воззва́х к Тебе. Возлюби́те Го́спода, вси преподо́бнии Его, я́ко и́стины взыска́ет Госпо́дь, и воздае́т изли́ше творя́щим горды́ню. Мужа́йтеся, и да крепи́тся се́рдце ваше, вси упова́ющии на Го́спода.

Псалом 90.

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его наде́ешися: ору́жием обы́дет тя и́стина Его. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое, Вы́шняго положи́л еси́ прибе́жище твое. Не прии́дет к тебе зло, и ра́на не прибли́жится телеси́ твоему́, я́ко А́нгелом Своим запове́сть о тебе́, сохрани́ти тя во всех путе́х твоих. На рука́х во́змут тя, да не когда́ преткне́ши о ка́мень но́гу твою, на а́спида и васили́ска насту́пиши, и попере́ши льва и змия. Я́ко на Мя упова́, и изба́влю и́: покры́ю и́, я́ко позна́ имя Мое. Воззове́т ко Мне, и услы́шу его: с ним есмь в ско́рби, изму́ его, и просла́влю его́, долгото́ю дней испо́лню его, и явлю́ ему спасе́ние Мое.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же.
(Трижды.)
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
  
И начинаем глаголати стихи со сладкопением, не скоро и великим гласом на оба лика, кийждо лик свой стих.
  
Первый лик поет:
С на́ми Бог, разуме́йте, язы́цы, и покаря́йтеся:
Я́ко с на́ми Бог.
  
Вторый лик поет тойже Стих:
С на́ми Бог, разуме́йте, язы́цы, и покаря́йтеся:
Я́ко с на́ми Бог.
  
Таже по чину кийждо лик свой Стих:
Услы́шите до после́дних земли́:
Я́ко с на́ми Бог.
Могу́щии покоря́йтеся:
Я́ко с на́ми Бог.
А́ще бо па́ки возмо́жете, и па́ки побежде́ни бу́дете:
Я́ко с на́ми Бог.
И и́же а́ще сове́т совещава́ете, разори́т Госпо́дь:
Я́ко с на́ми Бог.
И сло́во, е́же а́ще возглаго́лете, не пребу́дет в вас:
Я́ко с на́ми Бог.
Стра́ха же ва́шего не убои́мся, ниже́ смути́мся:
Я́ко с на́ми Бог.
Го́спода же Бо́га на́шего Того́ освяти́м, и Той бу́дет нам в страх:
Я́ко с на́ми Бог.
И а́ще на Него́ наде́яся бу́ду, бу́дет мне во освяще́ние:
Я́ко с на́ми Бог.
И упова́я бу́ду на Него́, и спасу́ся Им:
Я́ко с на́ми Бог.
Се аз и де́ти, я́же ми даде́ Бог:
Я́ко с на́ми Бог.
Лю́дие ходя́щии во тьме, ви́деша свет ве́лий:
Я́ко с на́ми Бог.
Живу́щии во стране́, и се́ни сме́ртней, свет возсия́ет на вы:
Я́ко с на́ми Бог.
Я́ко Отроча́ роди́ся нам, Сын, и даде́ся нам:
Я́ко с на́ми Бог.
Его́же нача́льство бысть на ра́ме Его:
Я́ко с на́ми Бог.
И ми́ра Его несть преде́ла:
Я́ко с на́ми Бог.
И нарица́ется и́мя Его́, вели́ка сове́та А́нгел:
Я́ко с на́ми Бог.
Чу́ден сове́тник:
Я́ко с на́ми Бог.
Бог кре́пок, Власти́тель, Нача́льник ми́ра:
Я́ко с на́ми Бог.
Оте́ц бу́дущаго ве́ка:
Я́ко с на́ми Бог.
  
Исполнившимся же стихом, я́ко предречеся, поется:
С на́ми Бог, разуме́йте, язы́цы, и покоря́йтеся:
Я́ко с на́ми Бог.
  
И паки тожде от обою лику:
С на́ми Бог, разуме́йте, язы́цы, и покоря́йтеся:
Я́ко с на́ми Бог.
Сла́ва Отцу́ и Сы́ну и Свято́му Ду́ху.
Первый Лик:
С на́ми Бог.
И ны́не и при́сно и во ве́ки веко́в. Ами́нь.
  
Вторый лик тожде:
С на́ми Бог.
  
Таже два лика вкупе:
Я́ко с на́ми Бог.
  
И абие настоящия тропари:
Первый Лик:
День преше́д, благодарю́ Тя, Го́споди, ве́чер прошу́ с но́щию, без греха́ пода́ждь ми, Спа́се, и спаси́ мя.
Вторый Лик:
Сла́ва Отцу́ и Сы́ну и Свято́му Ду́ху.
День преше́д, славосло́влю Тя, Влады́ко, ве́чер прошу́ с но́щию, безсобла́знство пода́ждь ми, Спа́се, и спаси́ мя.
  
Таже оба лика:
И ны́не и при́сно и во ве́ки веко́в. Ами́нь.
День преше́д, песносло́влю Тя, Святы́й, ве́чер прошу́ с но́щию, ненаве́тен пода́ждь ми, Спа́се, и спаси́ мя.
Безпло́тное естество́ херуви́мское немо́лчными пе́сньми Тя славосло́вят.
Шестокри́льная живо́тная Серафи́ми непреста́нными гла́сы Тя превозно́сят.
А́нгелов же вся во́инства трисвяты́ми пе́сньми Тя восхваля́ют.
Пре́жде бо всех еси́ сый Оте́ц, и собезнача́льна и́маши Твоего́ Сы́на,
И равноче́стна нося́й Ду́ха жи́зни, Тро́ицы явля́еши неразде́льное.
Пресвята́я Де́во, Ма́ти Бо́жия, и и́же Сло́ва самови́дцы и слуги́,
Проро́к же и му́ченик вси ли́цы, я́ко безсме́ртну иму́ще жизнь,
О всех моли́теся приле́жно, я́ко вси есмы́ в беда́х.
Да пре́лести изба́вльшеся лука́ваго, а́нгельскую вопие́м песнь:
Святы́й, Святы́й, Святы́й, Трисвяты́й Го́споди, поми́луй и спаси́ нас. Ами́нь.
  
(Сие глаголют во святей горе Афонстей, и в прочих монастырех по стиху, кийждо лик свой стих.)
  
И абие низким гласом:
Ве́рую во еди́наго Бо́га Отца́, Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, и́мже вся бы́ша. Нас ра́ди челове́к и на́шего ради спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.
  
И абие священник возглашает пред царскими дверьми, а лик за ним повторяет:
Священник:
Пресвята́я Влады́чице Богоро́дице, моли́ о нас гре́шных.
Пресвята́я Влады́чице Богоро́дице, моли́ о нас гре́шных.
(Дважды.)
Священник:
Вся небе́сныя си́лы святы́х А́нгел и Арха́нгел, моли́те о нас гре́шных.
Вся небе́сныя си́лы святы́х А́нгел и Арха́нгел, моли́те о нас гре́шных.
Священник:
Святы́й Иоа́нне Проро́че и Предте́че и Крести́телю Го́спода на́шего Иису́са Христа́, моли́ о нас гре́шных.
Святы́й Иоа́нне Проро́че и Предте́че и Крести́телю Го́спода на́шего Иису́са Христа́, моли́ о нас гре́шных.
Священник:
Святи́и сла́внии апо́столи, проро́цы и му́ченицы, и вси святи́и, моли́те о нас гре́шных.
Святи́и сла́внии апо́столи, проро́цы и му́ченицы, и вси святи́и, моли́те о нас гре́шных.
Священник:
Преподо́бнии и богоно́снии отцы́ на́ши, па́стырие и учи́телие вселе́нныя, моли́те о нас гре́шных.
Преподо́бнии и богоно́снии отцы́ на́ши, па́стырие и учи́телие вселе́нныя, моли́те о нас гре́шных.
  
(Зде же глаголется и святый храма.)
Священник:
Непобеди́мая и непостижи́мая, и Боже́ственная си́ло Честна́го и Животворя́щаго Креста́, не оста́ви нас гре́шных.
Непобеди́мая и непостижи́мая, и Боже́ственная си́ло Честна́го и Животворя́щаго Креста́, не оста́ви нас гре́шных.
Священник:
Бо́же, очи́сти нас гре́шных.
Бо́же, очи́сти нас гре́шных.
Священник:
Бо́же, очи́сти нас гре́шных и поми́луй нас. (Единожды.)
Чтец:
Святы́й Бо́же, Святы́й Кре́пкий, Святы́й Безсме́ртный, поми́луй нас.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ради.
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник:
Я́ко Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Чтец:
Ами́нь.

Тропари, глас 2:

Лик:
Апо́столи, му́ченицы и проро́цы, / святи́теліе, преподо́бніи и пра́ведніи, / до́брѣ по́двиг соверши́вшіи, и вѣ́ру соблю́дшіи, / дерзнове́ніе иму́щіи ко Спа́су, / о на́с Того́, я́ко блага, моли́те // спасти́ся, мо́лимся, душа́м на́шым.
Сла́ва Отцу́ и Сы́ну и Свято́му Ду́ху.

за упокой, глас 2:

Помяни́, Го́споди, я́ко благ, рабы́ Твоя́, / и ели́ка в житіи́ согрѣши́ша, прости́: / никто́же бо безгрѣ́шен, то́кмо Ты́, // могі́й и преста́вленным да́ти поко́й.
И ны́не и при́сно и во ве́ки веко́в. Ами́нь.
Ма́ти Свята́я неизрече́ннаго Све́та, / а́нгельскими Тя́ пе́сньми почита́юще, // благоче́стно велича́ем.
Чтец:
Го́споди, поми́луй.
(40 раз.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
И́менем Госпо́дним благослови́, о́тче.
Священник:
Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас
Чтец:
Ами́нь.

Молитва Великаго Василия:

Го́споди, Го́споди, избавле́й нас от вся́кия стрелы́ летя́щия во дни, изба́ви нас и от вся́кия ве́щи во тьме преходя́щия. Приими́ же́ртву вече́рнюю, рук на́ших воздея́ние. Сподо́би же нас и нощно́е по́прище без поро́ка прейти́, неискуше́ны от злых. И изба́ви нас от вся́каго смуще́ния и боя́зни, я́же от диа́вола нам прибыва́ющия. Да́руй душа́м на́шим умиле́ние, и помысло́м на́шим попече́ние, е́же на стра́шнем и пра́веднем Твое́м суде́ испыта́ния. Пригвозди́ стра́ху Твоему́ пло́ти на́ша, и умертви́ у́ды на́ша, су́щия на земли́, да и со́нным безмо́лвием просвети́мся, зре́нием суде́б Твои́х. Отыми́ же от нас вся́кое мечта́ние неподо́бное, и по́хоть вре́дну. Возста́ви же нас во вре́мя моли́твы, утвержде́ны в ве́ре, и преспева́ющия в за́поведех Твои́х, благоволе́нием и бла́гостию Единоро́днаго Сы́на Твоего́, с Ни́мже благослове́н еси́, с Пресвяты́м и Благи́м, и Животворя́щим Твои́м Ду́хом, ны́не и при́сно и во ве́ки веко́в. Ами́нь.

И абие:

Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50.

Поми́луй мя, Бо́же, по вели́цей ми́лости Твоей, и по мно́жеству щедро́т Твоих очи́сти беззако́ние мое. Наипа́че омы́й мя от беззако́ния моего́, и от греха́ моего очи́сти мя. Я́ко беззако́ние мое аз зна́ю, и грех мой предо мно́ю есть вы́ну. Тебе еди́ному согреши́х и лука́вое пред Тобою сотвори́х, я́ко да оправди́шися во словесе́х Твоих, и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя. Се бо и́стину возлюби́л еси́, безве́стная и та́йная прему́дрости Твоея яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое от грех моих и вся беззако́ния моя очи́сти. Се́рдце чи́сто сози́жди во мне, Бо́же, и дух прав обнови́ во утро́бе моей. Не отве́ржи мене́ от лица́ Твоего, и Ду́ха Твоего Свята́го не отыми́ от Мене́. Возда́ждь ми ра́дость спасе́ния Твоего, и Духом Влады́чним утверди́ мя. Научу́ беззако́нныя путе́м Твоим, и нечести́вии к Тебе обратя́тся. Изба́ви мя от крове́й, Бо́же, Бо́же спасе́ния моего, возра́дуется язы́к мой пра́вде Твоей. Го́споди, устне́ мои отве́рзеши, и уста́ моя возвестя́т хвалу́ Твою. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н: се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твоим Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда возложа́т на олта́рь Твой тельцы́.

Псалом 101.

Го́споди, услы́ши моли́тву мою, и вопль мой к Тебе́ да прии́дет. Не отврати́ лица́ Твоего от Мене́: во́ньже а́ще день скорблю́, приклони́ ко мне у́хо Твое: во́ньже а́ще день призову́ Тя, ско́ро услы́ши мя. Я́ко исчезо́ша я́ко дым дни́е мои, и ко́сти моя я́ко суши́ло сосхо́шася. Уя́звен бых я́ко трава́, и и́зсше се́рдце мое, я́ко забы́х сне́сти хлеб мой. От гла́са воздыха́ния моего прильпе́ кость моя пло́ти моей. Уподо́бихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осо́бящаяся на зде. Весь день поноша́ху ми врази́ мои, и хва́лящии мя мною кленя́хуся. Зане́ пе́пел я́ко хлеб ядя́х, и питие́ мое с пла́чем растворя́х. От лица́ гне́ва Твоего и я́рости Твоея́: я́ко возне́с низве́ргл мя еси́. Дни́е мои я́ко сень уклони́шася, и аз я́ко се́но изсхо́х. Ты же, Го́споди, во век пребыва́еши, и па́мять Твоя в род и род. Ты воскре́с уще́дриши Сио́на, я́ко вре́мя уще́дрити его, я́ко прии́де вре́мя. Я́ко благоволи́ша раби́ Твои ка́мение его, и персть его уще́дрят. И убоя́тся язы́цы и́мене Госпо́дня, и вси ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Своей. Призре́ на моли́тву смире́нных, и не уничижи́ моле́ния их. Да напи́шется сие́ в род ин, и лю́дие зи́ждемии восхва́лят Го́спода. Я́ко прини́че с высоты́ святы́я Своея́, Госпо́дь с небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных, возвести́ти в Сио́не и́мя Госпо́дне, и хвалу́ Его во Иерусали́ме. Внегда́ собра́тися лю́дем вку́пе и царе́м, е́же рабо́тати Го́сподеви. Отвеща́ Ему на пути́ кре́пости Его: умале́ние дней моих возвести́ ми. Не возведи́ мене́ в преполове́ние дней мои́х: в ро́де родо́в ле́та Твоя. В нача́лех Ты, Го́споди, зе́млю основа́л еси́, и дела́ руку́ Твоею суть небеса́. Та поги́бнут, Ты же пребыва́еши, и вся я́ко ри́за обетша́ют, и я́ко оде́жду свие́ши я́, и изменя́тся. Ты же то́йжде еси́, и ле́та Твоя не оскуде́ют. Сы́нове раб Твоих вселя́тся, и се́мя их во век испра́вится.

Молитва Манассии, царя иудейска:

Го́споди Вседержи́телю, Бо́же оте́ц на́ших, Авраа́мов, и Исаа́ков, и Иа́ковль, и се́мене их пра́веднаго, сотвори́вый не́бо и зе́млю со все́ю ле́потою их, связа́вый мо́ре сло́вом повеле́ния Твоего́, заключи́вый бе́здну, и запеча́тствовавый ю́ стра́шным и сла́вным и́менем Твои́м, его́же вся боя́тся, и трепе́щут от лица́ си́лы Твоея́, я́ко непостоя́нно великоле́пие сла́вы Твоея́, и нестерпи́м гнев е́же на гре́шники преще́ния Твоего́, безме́рна же и неизсле́дованна ми́лость обеща́ния Твоего́: Ты бо еси́ Госпо́дь Вы́шний, благоутро́бен, долготерпели́в, и многоми́лостив, и ка́яйся о зло́бах челове́ческих. Ты, Го́споди, по мно́жеству бла́гости Твоея́, обеща́л еси́ покая́ние и оставле́ние согреши́вшим Тебе́, и мно́жеством щедро́т Твои́х, определи́л еси́ покая́ние гре́шником во спасе́ние. Ты у́бо, Го́споди Бо́же сил, не положи́л еси́ покая́ние пра́ведным, Авраа́му, и Исаа́ку, и Иа́кову, не согреши́вшим Тебе́: но положи́л еси́ покая́ние на мне гре́шнем, зане́ согреши́х па́че числа́ песка́ морска́го. Умно́жишася беззако́ния моя, Го́споди, умно́жишася беззако́ния моя, и несмь досто́ин воззре́ти, и ви́дети высоту́ небе́сную, от мно́жества непра́вд мои́х, сля́чен есмь мно́гими у́зами желе́зными, во е́же не возвести́ главы́ моея́, и несть ми ослабле́ния: зане́ прогне́вах я́рость Твою́, и лука́вое пред Тобо́ю сотвори́х, не сотвори́вый во́ли Твоея́, и не сохрани́вый повеле́ний Твоих. И ны́не приклоня́ю коле́на се́рдца, тре́буя от Тебе́ бла́гости. Согреши́х, Го́споди, согреши́х, и беззако́ния моя аз вем: но прошу́ моля́ся, осла́би ми Го́споди, осла́би ми, и не погуби́ мене́ со беззако́ньми мои́ми, ниже́ в век враждова́в соблюде́ши зол мои́х, ниже́ осу́диши мя в преиспо́дних земли́. Зане́ Ты еси́, Бо́же, Бог ка́ющихся, и на мне яви́ши всю бла́гость Твою́, я́ко недосто́йна су́ща спасе́ши мя, по мно́зей ми́лости Твое́й, и восхвалю́ Тя вы́ну во днех живота́ моего́. Я́ко Тя пое́т вся си́ла небе́сная, и Твоя́ есть сла́ва во ве́ки веко́в. Ами́нь.
Святы́й Бо́же, Святы́й Кре́пкий, Святы́й Безсме́ртный, помилуй нас.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ради.
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник:
Я́ко Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.
Лик:
Ами́нь.

Тропари, глас 6:

Поми́луй нас, Го́споди, поми́луй нас: вся́каго бо отве́та недоуме́юще, сию́ Ти моли́тву, я́ко Влады́це, гре́шнии прино́сим, поми́луй нас.
Сла́ва Отцу́ и Сы́ну и Свято́му Ду́ху.
Го́споди, поми́луй нас: на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко Благоутро́бен, и изба́ви ны от враг на́ших: Ты бо еси́ Бог наш, и мы лю́дие Твои́, вси дела́ руку́ Твое́ю, и имя Твое́ призыва́ем.
И ны́не и при́сно и во ве́ки веко́в. Ами́нь.
Милосе́рдия две́ри отве́рзи нам, Благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго.
Чтец:
Го́споди, поми́луй.
(40 раз.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
И́менем Госпо́дним благослови́, о́тче.
Священник:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь.
Влады́ко Бо́же, О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 69.

Бо́же, в по́мощь мою вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою, да возвратя́тся вспять, и постыдя́тся хотя́щии ми зла́я. Да возвратя́тся а́бие стыдя́щеся глаго́лющии ми: бла́гоже, бла́гоже. Да возрадуются и возвеселя́тся о Тебе́ вси и́щущии Тебе́, Бо́же, и да глаго́лют вы́ну: да возвели́чится Госпо́дь, лю́бящии спасе́ние Твое́. Аз же нищ есмь и убо́г, Бо́же, помози́ ми. Помо́щник мой и Изба́витель мой еси́ Ты, Го́споди, не закосни́.

Псалом 142.

Го́споди, услы́ши моли́тву мою, внуши́ моле́ние мое во и́стине Твоей, услы́ши мя в пра́вде Твоей и не вни́ди в суд с рабо́м Твоим, я́ко не оправди́тся пред Тобою всяк живы́й. Я́ко погна́ враг ду́шу мою, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое. Помяну́х дни дре́вния, поуча́хся во всех де́лех Твоих, в творе́ниих руку́ Твоею поуча́хся. Возде́х к Тебе ру́це мои, душа́ моя, я́ко земля́ безво́дная Тебе. Ско́ро услы́ши мя, Го́споди, исчезе́ дух мой, не отврати́ лица́ Твоего от Мене́, и уподо́блюся низходя́щим в ров. Слы́шану сотвори́ мне зау́тра ми́лость Твою, я́ко на Тя упова́х. Скажи́ мне, Го́споди, путь, во́ньже пойду́, я́ко к Тебе взях ду́шу мою. Изми́ мя от враг мои́х, Го́споди, к Тебе прибего́х. Научи́ мя твори́ти во́лю Твою, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего ради, Го́споди, живи́ши мя, пра́вдою Твое́ю изведе́ши от печа́ли ду́шу мою. И ми́лостию Твоею потреби́ши враги́ моя и погуби́ши вся стужа́ющия души́ моей, я́ко аз раб Твой есмь.
Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ради сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди Сы́не Единоро́дный Иису́се Христе́ и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас: взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.
На вся́ку нощь благословлю́ Тя, и восхвалю́ и́мя Твое́ во ве́ки и в век ве́ка.
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у тебе́ исто́чник живота́, во све́те Твое́м у́зрим свет. Проба́ви ми́лость Твою ве́дущим Тя.
Сподо́би, Го́споди, в нощь сию, без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.
Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Канон:

Песнь 1:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Украси́в ду́шу доброде́телей ви́ды,/ благода́тей прия́тельну Ду́ха сию́ Свята́го соверши́л еси́,/ отню́дуже бе́здну прему́дрости отры́гнул еси́,/ ересе́й пучи́ны изсуша́ющу, Кири́лле.
Припев:
Святи́телю о́тче Кири́лле, моли́ Бо́га о нас.
Тропарь:
Превы́шший ум ве́щных соде́лал еси́, невеще́ственных служи́телей соо́бщник показа́вся,/ огне́м же слове́с твои́х всю попали́л еси́ ве́щь ересе́й, Кири́лле,/ церко́вное свети́ло неусыпа́ющее.
Припев:
Святи́телю о́тче Кири́лле, моли́ Бо́га о нас.
Тропарь:
Глаго́л твои́х воня́ми сладкодыха́тельными неи́стовства тезоимени́тнаго, прему́дре,/ ересе́й всех нестерпи́мый кал отгна́в,/ дале́че сотвори́л еси́, я́ко па́стырь и́стиннейший,/ я́ко Христо́во благово́ние быв.
Припев:
Пресвята́я Богоро́дице, спаси́ нас
Богородичен:
От тиме́ния страсте́й, помышле́ний треволне́ния,/ от стрел лука́ваго, от вся́каго прило́га сопроти́внаго спаси́, Чи́стая Богороди́тельнице,/ ду́ши воспева́ющих Твое́ несказа́нное рождество́, Всенепоро́чная.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Врата́ сме́рти и вереи́, Твое́ю сме́ртию сокруши́л еси́ Безсме́ртне, врата́ отве́рзи Влады́ко, па́че ума́ безсме́ртия у́спшым, моли́твами страстоте́рпец Твои́х.
Припев:
Упокой, Господи, души усопших раб Твоих.
Тропарь
Да Боже́ственнаго живота́ сподо́бимся, соше́л еси́ к сме́рти, тоя́ же испрове́рг сокро́вища, на́с отту́ду извле́кл еси́: ны́не же Жизнода́вче, преста́вленныя упоко́й.
Припев:
Упокой, Господи, души усопших раб Твоих.
Тропарь
Ты́ мое́ тле́нное же и ме́ртвенное восприи́м, в нетле́ние обле́кл еси́, и к безконе́чному житию́ и блаже́нному возне́сл еси́, иде́же я́ко ще́др, и́хже прия́л еси́, упоко́й.
Сла́ва Отцу́ и Сы́ну и Свято́му Ду́ху.
Тропарь
Ты́ мое́ тле́нное же и ме́ртвенное восприи́м, в нетле́ние обле́кл еси́, и к безконе́чному житию́ и блаже́нному возне́сл еси́, иде́же я́ко Ще́др, и́хже прия́л еси́, упоко́й.
И ны́не и при́сно и во ве́ки веко́в. Ами́нь.
Богоро́дичен
Ро́ждшую е́же от Бо́га Бо́жие Сло́во, ве́рнии воспои́м: Та́ бо Всечи́стая пу́ть жи́зни уме́ршым бы́сть, Ю́же я́ко богоприе́мницу и Богоро́дицу просла́вим.

Песнь 3:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Сия́я светлостьми́ духо́вныя прему́дрости,/ трисия́нное Божество́ Тро́ицы, о́тче, све́тло су́щим на земли́ уясни́л еси́,/ и́мже тьмы́ пре́лести изба́вихомся.
Припев:
Святи́телю о́тче Кири́лле, моли́ Бо́га о нас.
Тропарь:
Цевни́ца яви́лся еси́ Всесвята́го Ду́ха, Богому́дре,/ возглаша́ющи пе́снь явле́ния Христо́ва,/ Его́же во дву естества́х пропове́дал еси́, услажда́я ду́ши на́ша.
Припев:
Святи́телю о́тче Кири́лле, моли́ Бо́га о нас.
Тропарь:
Дом святы́ни твоя́ душа́ показа́ся,/ в него́же Оте́ц, и Сын, и Дух Живонача́льный преесте́ственно всели́ся,/ Ему́же пое́м:/ Свят еси́, Го́споди.
Припев:
Пресвята́я Богоро́дице, спаси́ нас
Богородичен:
Ниже́ ум Небе́сный па́че ума́ рождества́ Твоего́ мо́жет сказа́ти, Отрокови́це,/ Ума́ бо Пе́рваго во утро́бе Сло́во, Чи́стая, зачала́ еси́,/ вся́ческая сло́вом соста́вльшаго.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Я́ко Еди́н Бла́г сы́й, я́ко Еди́н Многоми́лостив, я́же благоче́стно к Тебе́ отше́дшыя, в Небе́сных селе́ниих упоко́й, иде́же неизрече́нная ра́дость и наслажде́ние, и иде́же собо́р му́ченический весели́тся.
Припев:
Упокой, Господи, души усопших раб Твоих.
Тропарь
Ты́ еди́н яви́лся еси́ на земли́, Спа́се мо́й безгре́шен, и́же грехи́ ми́ра взе́мляй я́ко милосе́рд: от ми́ра сего́ преста́вльшихся ве́рою, ду́шы упоко́й во дво́рех святы́х Твои́х, в сла́дости ра́йстей Человеколю́бче.
Припев:
Упокой, Господи, души усопших раб Твоих.
Тропарь
Сме́рти держа́ву низло́ж, живо́т неконча́емый все́м ве́рным источи́л еси́ Влады́ко: в то́м у́бо учини́ благоче́стно отше́дшыя, презира́я безме́рная прегреше́ния, и проща́я грехи́ и́х Человеколю́бче.
Сла́ва Отцу́ и Сы́ну и Свято́му Ду́ху.
Тропарь
Сме́рти держа́ву низло́ж, живо́т неконча́емый все́м ве́рным источи́л еси́ Влады́ко: в то́м у́бо учини́ благоче́стно отше́дшия, презира́я безме́рная прегреше́ния, и проща́я грехи́ и́х Человеколю́бче.
И ны́не и при́сно и во ве́ки веко́в. Ами́нь.
Богоро́дичен
Без се́мене зача́т Чи́стая, Сло́во присносу́щное, пло́тски к на́м прише́дшее, и сме́рти кре́пость разори́вшее, и ме́ртвым воскресе́ние и жи́знь ве́чную Свои́м милосе́рдием да́рующее.
Го́споди, поми́луй.
(Трижды.)

Седален святи́теля Кири́лла, Глас 8:

  
Подо́бен: Прему́дрости:
Седален:
Прему́дростию Сло́ва обогате́в, отры́гнул еси́ уче́ний ре́ки живо́тныя,/ и вся́ку напои́л еси́ благочести́вых мы́сль,/ и па́лицею Боже́ственною упа́сл еси́ ста́до на зла́це,/ Боже́ственнаго напита́л еси́ ра́зума./ Те́мже я́ко па́стыря и учи́теля вели́ка и ве́рных засту́пника/ восхваля́ем тя, Кири́лле святи́телю, зову́ще:/ моли́ Христа́ Бо́га грехо́в оставле́ние пода́ти/ честву́ющим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
КрестоБогоро́дичен:
А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Преми́рныя му́дрости струю́, преподо́бне, твое́ се́рдце прие́мшо,/ отры́гну уче́ния бе́здну, умы́ нече́ствующих погружа́ющую.
Припев:
Святи́телю о́тче Кири́лле, моли́ Бо́га о нас.
Тропарь:
Еди́ну кре́пость, еди́но Существо́, еди́ну во́лю Триипоста́снаго Божества́ пропове́дал еси́/ и многобо́жия, Кири́лле, пре́лести пото́к изсуши́л еси́.
Припев:
Святи́телю о́тче Кири́лле, моли́ Бо́га о нас.
Тропарь:
Ум ка́льный и пребезу́мный Ма́нентов,/ я́ко ум имы́й и Богонауче́н, блаже́нне, блиста́нии слове́с твои́х попали́в,/ я́ве обличи́л еси́.
Припев:
Пресвята́я Богоро́дице, спаси́ нас
Богородичен:
Я́ко вы́шши всех тва́рей, Чи́стая, Творца́ тва́ри зачала́ еси́/ и па́че естества́ ро́ждши, естество́ на́ше обно́вльшаго.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Умертви́в а́д непобеди́мою Твое́ю си́лою, вмене́н бы́л еси́ в ме́ртвых, еди́н сы́й свобо́дь Христе́, ду́шы свободи́ благочести́вых, и е́же в не́м осужде́ния, святы́х му́ченик мольба́ми.
Припев:
Упокой, Господи, души усопших раб Твоих.
Тропарь
И́же все́х сы́й я́ко Влады́ка, противодосто́йную и́же от Ада́ма Твоего́ заколе́ния, изба́ву да́л еси́ и це́ну: те́мже мо́лимся Твои́м щедро́там, преста́вльшыяся упоко́й, согреше́ний подая́ оставле́ние.
Припев:
Упокой, Господи, души усопших раб Твоих.
Тропарь
Прия́л еси́ Спа́се мо́й, е́же во гро́бе положе́ние, и я́же во гробе́х жи́ти осужде́нныя мертвецы́, я́ко Бо́г воскреси́л еси́. Ны́не же жи́зни присносу́щныя сподо́би преста́вленныя, я́ко Еди́н Человеколю́бец
Сла́ва Отцу́ и Сы́ну и Свято́му Ду́ху.
Тропарь
Прия́л еси́ Спа́се мо́й, е́же во гро́бе положе́ние, и я́же во гробе́х жи́ти осужде́нныя мертвецы́, я́ко Бо́г воскреси́л еси́. Ны́не же жи́зни присносу́щныя сподо́би преста́вленныя, я́ко Еди́н Человеколю́бец.
И ны́не и при́сно и во ве́ки веко́в. Ами́нь.
Богоро́дичен
Спасе́ся ро́д челове́ческий Рождество́м Твои́м: Ты́ бо родила́ еси́ на́м ипоста́сный Живо́т, сме́рти потребле́ние, и к жи́зни соде́ловающий восхо́д, Богороди́тельнице Пренепоро́чная Влады́чице.

Песнь 5:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Жезло́м честны́я, святи́телю, прему́дрости твоея́/ упа́сл еси́ на воде́ правосла́внаго служе́ния па́ству твою́, блаже́нне.
Припев:
Святи́телю о́тче Кири́лле, моли́ Бо́га о нас.
Тропарь:
Сло́во твое́ све́том Боже́ственным облиста́емо, о Кири́лле!/ просвеще́нных во Иерусали́ме мглу неразу́мия разруши́л еси́.
Припев:
Пресвята́я Богоро́дице, спаси́ нас
Богородичен:
Но́щь, Пречи́стая, страсте́й и злых очерне́ния покрыва́ет ду́шу мою́,/ Светода́вца ро́ждшая, озари́ мя, молю́ся.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Исцеля́яй от я́да сме́ртнаго, сме́рть прия́т, и сме́рти жа́ло притупи́л еси́: но Са́м упоко́й, и́хже прия́л еси́ жизнода́вче, му́ченик мольба́ми.
Припев:
Упокой, Господи, души усопших раб Твоих.
Тропарь
Умерщвле́ния и тле́ния челове́ки свободи́вый, ду́шы ве́рно преста́вленных учини́ во дво́рех святы́х Твои́х, отню́дуже отбеже́ вся́ка ско́рбь, и весе́лие водворя́ется.
Припев:
Упокой, Господи, души усопших раб Твоих.
Тропарь
Ра́й у́бо с Тобо́ю пове́шенному, я́ко отве́рзл еси́: ны́не приими́, ду́шы Влады́ко, к Тебе́ ве́рою преста́вльшыяся, подая́ и́м в Це́ркви пе́рвенец водвори́тися.
Сла́ва Отцу́ и Сы́ну и Свято́му Ду́ху.
Тропарь
Ра́й у́бо с Тобо́ю пове́шенному, я́ко отве́рзл еси́: ны́не приими́, ду́ши, Влады́ко, к Тебе́ ве́рою преста́вльшияся, подая́ и́м в Це́ркви пе́рвенец водвори́тися.
И ны́не и при́сно и во ве́ки веко́в. Ами́нь.
Богоро́дичен
Избавля́ющи на Тя́ наде́жды держа́ву иму́щих, к приста́нищу Боже́ственныя во́ли ти́хо наста́ви, ма́терним Твои́м дерзнове́нием к Сы́ну Твоему́, Благослове́нная Всенепоро́чная.

Песнь 6:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Река́ ты я́ко, из ино́го Еде́ма изше́л еси́,/ жизното́чных испо́лнена вод Ду́ха,/ и церко́вныя, святи́телю, напоя́еши бразды́.
Припев:
Святи́телю о́тче Кири́лле, моли́ Бо́га о нас.
Тропарь:
Глаго́л твои́х луче́м, я́ко от бу́ри морски́я нече́стия спаса́еши лю́ди, освяще́ннейше,/ к ти́хому приста́нищу правосла́вия тех призыва́я.
Припев:
Пресвята́я Богоро́дице, спаси́ нас
Богородичен:
Онебеси́ла еси́ озе́мльствованное естество́, Всенепоро́чная, челове́ческое/ и истле́вшее сие́ новосоде́лала еси́,/ сего́ ра́ди, Отрокови́це, вси немо́лчными гла́сы Тя сла́вим.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Я́ко милосе́рд, преста́вленным да́руй прегреше́ний проще́ние, и ве́чное наслажде́ние подая́, иде́же сия́ет лица́ Твоего́ све́тлость, и озаря́ет страстоте́рпцы Твоя́.
Припев:
Упокой, Господи, души усопших раб Твоих.
Тропарь
И́же кро́вию от ре́бр Твои́х исте́кшею ми́р искупи́л еси́, ве́рою усо́пшыя у́бо Христе́ изба́ви честны́ми Страстьми́ Твои́ми: Ты́ бо це́ну за все́х Себе́ да́л еси́.
Припев:
Упокой, Господи, души усопших раб Твоих.
Тропарь
И́же созда́вый мя́ рука́ма пречи́стыми пе́рвее и ду́х дарова́вый, и к земли́ низпа́дша зле́, па́ки обнови́вый красне́йше, ны́не ду́шы преста́вльшихся Са́м упоко́й.
Сла́ва Отцу́ и Сы́ну и Свято́му Ду́ху.
Тропарь
Черто́гу Твоему́ светоно́сному Го́споди, всели́ти сподо́би, я́же в ве́ре к Тебе́ усо́пшия, те́х презира́я прегреше́ния, я́ко Бла́г и Милосе́рд и Многоми́лостив.
И ны́не и при́сно и во ве́ки веко́в. Ами́нь.
Богоро́дичен
Пое́м Тя́ Благослове́нная Чи́стая, Ея́же ра́ди на́м возсия́ су́щым во тьме́ и се́ни сме́ртней, пра́вды незаходи́мое Со́лнце: Ты́ во на́шего спасе́ния хода́таица была́ еси́.
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Кондак святи́теля Кири́лла, Глас 4:

Хор:
Язы́ком твои́м, му́дре,/ Боже́ственными вдохнове́ньми просвети́л еси́ твоя́ лю́ди/ еди́ну че́сти Тро́ицу,/ Естество́м неразде́льну, разделя́ему же Ли́цы./ Те́мже, ра́дующеся, всесвяту́ю твою́ па́мять пра́зднуем,/ и́же к Бо́гу моли́твенника тя предлага́ющии.

Песнь 7:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Име́я о́гнь во уме́, о́тче, стра́ха Бо́жия,/ ве́щь испепели́л еси́ сласте́й, воспева́я:/ благослове́н еси́, Го́споди, Бо́же оте́ц на́ших.
Припев:
Святи́телю о́тче Кири́лле, моли́ Бо́га о нас.
Тропарь:
Слеза́ми страсте́й пла́мень погаси́в, блаже́нне,/ све́тлость сохрани́л еси́ неугаси́му твоея́ души́, взыва́я:/ благослове́н еси́, Го́споди, Бо́же оте́ц на́ших.
Припев:
Святи́телю о́тче Кири́лле, моли́ Бо́га о нас.
Тропарь:
Струю́ живу́ю име́я лия́нием Ду́ха, в души́, Богому́дре,/ источи́л еси́, о́тче, ре́ки уче́ний, Це́рковь напоя́ющия,/ благоче́стно тя честву́ющую.
Припев:
Пресвята́я Богоро́дице, спаси́ нас
Богородичен:
Всю Тя освяща́ет Святы́й,/ от Твоея́ пло́ти заи́мствовавый пло́ть Себе́, Богоро́дице,/ во святы́х Госпо́дь живы́й, Бог наш.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Сия́нии Пречи́стыя сла́вы Твоея́, озари́тися Христе́ подава́й, от бу́ри мирски́я к Тебе́ отше́дшым, и те́х сподо́би с му́ченики взыва́ти Тебе́: хвали́мый отце́в Бо́же благослове́н еси́.
Припев:
Упокой, Господи, души усопших раб Твоих.
Тропарь
Но́в Ада́м вои́стинну бы́в, Ада́мов Соде́телю, И́же кля́тву бо Ада́мову еди́н потреби́л еси́. Те́мже мо́лимся Тебе́: преста́вленныя упоко́й в сла́дости ра́йстей Христе́, я́ко еди́н милосе́рд.
Припев:
Упокой, Господи, души усопших раб Твоих.
Тропарь
И́же на́шу есте́ственную не́мощь еди́н све́дый я́ко Бо́г, бла́г же и ми́лостив, вся́ и́хже преста́вил еси́, иде́же све́т незаходи́мый присеща́ет лица́ Твоего́, учини́ Христе́, хвали́мый отце́в Бо́же и препросла́влен.
Сла́ва Отцу́ и Сы́ну и Свято́му Ду́ху.
Тропарь
И́же на́шу есте́ственную не́мощь еди́н све́дый я́ко Бо́г, Бла́г же и Ми́лостив, вся́ и́хже преста́вил еси́, иде́же Све́т Незаходи́мый присеща́ет лица́ Твоего́, учини́ Христе́, хвали́мый отце́в Бо́же и препросла́влен.
И ны́не и при́сно и во ве́ки веко́в. Ами́нь.
Богоро́дичен
Зако́на се́ни, и дре́вняя гада́ния Твои́м преидо́ша Рождество́м Богома́ти, Ты́ бо на́м Боже́ственныя благода́ти Све́т возсия́ла еси́: и́мже дре́вних изба́вихомся долго́в Чи́стая, воспева́юще Бо́га препросла́вленнаго.

Песнь 8:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Дрема́ние небреже́ния, блаже́нне, от ве́ждей душе́вных отри́нув,/ пра́ведным прили́чным ны́не усну́л еси́ сном/ и ко дню невече́рняго Све́та преше́л еси́.
Припев:
Святи́телю о́тче Кири́лле, моли́ Бо́га о нас.
Тропарь:
Мо́лниями слове́с твои́х попали́л еси́ хвра́стную е́ресь, приснопа́мятне,/ и ве́рныя просвети́л еси́ еди́ну че́сти Тро́ицу начерта́ньми,/ во Еди́нице су́щую Естества́.
Припев:
Святи́телю о́тче Кири́лле, моли́ Бо́га о нас.
Тропарь:
Освяти́в себе́ поще́ньми, ме́ртву тебе́ ра́ди Бы́вшу/ ты безкро́вно же́ртвовал еси́, я́ко святи́тель Боже́ственный,/ я́ко та́ин неизрече́нных служи́тель, Кири́лле.
Припев:
Пресвята́я Богоро́дице, спаси́ нас
Богородичен:
Изба́вльшеся кля́твы прама́терния Тобо́ю, Чи́стая Богома́ти,/ Благослове́нная Влады́чице,/ благослови́м, Деви́це препросла́вленная, пресвято́е рождество́ Твое́, Всечи́стая.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Скве́рну всю́ Твои́х рабо́в усо́пших, Твоего́ человеколю́бия росо́ю отмы́в, Тя́ пе́сньми воспева́ти сподо́би: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.
Припев:
Упокой, Господи, души усопших раб Твоих.
Тропарь
Предстоя́тели Спа́се десны́я, ве́рою оправда́в моли́твами страстоте́рпец, я́же преста́вил еси́ ве́рныя, покажи́ пою́щыя: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.
Припев:
Упокой, Господи, души усопших раб Твоих.
Тропарь
И́же сме́рти и живота́ име́яй вся́кую вла́сть, я́же ве́рою усо́пшыя Твоего́ сия́ния улучи́ти благоволи́, взыва́ющыя: благослови́те вся́ дела́ Госпо́дня Го́спода, по́йте и превозноси́те Его́ во ве́ки.
Блaгocлoви́м Oтца́, и Cы́нa, и Cвята́гo Ду́хa, Го́cпoдa.
Тропарь
И́же сме́рти и живота́ име́яй вся́кую вла́сть, я́же ве́рою усо́пшия Твоего́ сия́ния улучи́ти благоволи́, взыва́ющия: благослови́те вся́ дела́ Госпо́дня Го́спода, по́йте и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богоро́дичен
Спасе́ния хода́таица на́м была́ еси́ Всенепоро́чная, и в непреходи́мыя ве́ки пребыва́ния же и све́тлости: Тебе́ Де́во Чи́стая, при́сно вся́ дела́ благослови́м, и превозно́сим во вся́ ве́ки.

Песнь 9:

  
Канон святи́теля Кири́лла , Глас 4:
Припев:
Святи́телю о́тче Кири́лле, моли́ Бо́га о нас.
Тропарь:
Ви́дети жела́я Христо́ву неизрече́нную, святи́телю, сла́ву,/ потща́лся еси́ стра́сти умертви́ти душетле́нныя,/ прия́телище се́рдце сотвори́ти прему́дрости бо́льшия и лу́чшия./ Те́мже тя ве́рою ублажа́ем.
Припев:
Святи́телю о́тче Кири́лле, моли́ Бо́га о нас.
Тропарь:
Звезду́ многосве́тлую, Христо́с Со́лнце, на церко́вней высоте́ положи́ тя, Кири́лле,/ луча́ми уче́ний свяще́нных озаря́юща се́рдца/ ве́рно соверша́ющих твою́ светоно́сную па́мять, преподо́бне.
Припев:
Святи́телю о́тче Кири́лле, моли́ Бо́га о нас.
Тропарь:
Собесе́дник и сослужи́тель был еси́ А́нгелом,/ я́ко бо безпло́тен, о́тче, на земли́ пожи́в,/ преподо́бным яви́лся еси́ соприча́стник и святи́телем равностоя́тель;/ с ни́миже лику́я, нас помина́й.
Припев:
Пресвята́я Богоро́дице, спаси́ нас
Богородичен:
Непло́дствующее Боже́ственных доброде́телей, Пречи́стая Богоро́дице,/ се́рдце мое́ покажи́, Де́во, плодоно́сно,/ я́же от непло́дове ро́ждшаяся/ во́лею вся претворя́ющего манове́нием,/ да Тя пою́, Всепе́тую.
  
Други́й кано́н усо́пшым, Глас 1:
Припев:
Ди́вен Бог во святы́х Свои́х, Бог Изра́илев.
Тропарь
Пощади́ я́ко Бо́г человеколюби́в, и ми́лостив, Твое́ созда́ние: и упоко́й в селе́ниих святы́х Твои́х, иде́же му́ченицы вси́ веселя́тся, ве́рою преста́вленыя от вре́менных, многоми́лостиве.
Припев:
Упокой, Господи, души усопших раб Твоих.
Тропарь
Име́яй ми́лостей бе́здну, препобежда́ющую рабо́в Твои́х прегреше́ния, и́хже прие́м избра́, упоко́й в не́дрех Авраа́млих Человеколю́бче, и с Ла́зарем во све́т Тво́й всели́.
Сла́ва Отцу́ и Сы́ну и Свято́му Ду́ху.
Тропарь
Изба́витель и Спа́с бы́в ро́ду челове́ческому, распя́тия ра́ди, я́же ны́не от на́с преста́вил еси́, я́ко Благода́тель, наслажде́ния Боже́ственнаго сподо́би, и живота́ нетле́ннаго, и весе́лия и све́тлости.
И ны́не и при́сно и во ве́ки веко́в. Ами́нь.
Богоро́дичен
О я́же па́че ума́ чуде́с Твои́х! Ты́ бо Де́во еди́на все́м, и́же под со́лнцем, подала́ еси́ разуме́ти нове́йшее чу́до Пречи́стая, Твоего́ рождества́ недоуме́ннаго: те́мже Тя́ вси́ велича́ем.

Песнопения святи́теля Кири́лла

  
Глас 4. Подо́бен: Я́ко до́бля:
Припев:
Святи́телю о́тче Кири́лле, моли́ Бо́га о нас.
Хор:
Я́ко звезда́, возсия́в,/ и ве́рныя просвети́л еси́/ свяще́нными светлостьми́ догма́тов твои́х,/ и е́реси омрачи́л еси́,/ и до конца́ победи́в,/ и, я́ко раб, да́нный тебе́ тала́нт умно́жил еси́,/ благоугоди́в Влады́це, Богому́дре./ Ему́же в ру́це отложи́л еси́ твой дух,/ Богоблаже́нне Кири́лле.
Припев:
Святи́телю о́тче Кири́лле, моли́ Бо́га о нас.
Хор:
Прему́дростию слове́с твои́х/ и сия́нием жития́ твоего́,/ я́ко звезда́ многосве́тлая, досточу́дне,/ посреди́ собо́ра просия́л еси́ отце́в,/ безбо́жнаго Македо́ния/ жи́лами удави́л еси́ благода́ти,/ и Святы́й и оживля́ющий вся Боже́ственный Дух/ хули́вшаго безу́мно/ и проявле́нно беззако́нновавшаго.
Припев:
Святи́телю о́тче Кири́лле, моли́ Бо́га о нас.
Хор:
Ум па́губный посрами́л еси́/ пребезу́мнаго Ма́нента,/ обличи́в предо́бре и мудре́йше/ скве́рная уче́ния сего́ бу́йства,/ учи́телей нача́льниче,/ иере́ев благоле́пие,/ Боже́ственный побо́рниче Христо́вы Це́ркве./ Сего́ ра́ди свято́е, веселя́щеся,/ соверша́ем твое́ успе́ние.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
  
Глас 4. Подо́бен: Я́ко до́бля:
На Кресте́ Тя я́ко узре́/ пригвожде́на, Го́споди,/ А́гница и Ма́ти Твоя́ дивля́шеся/ и – что виде́ние сие́, – взыва́ше, –/ Сы́не вожделе́нне?/ Сия́ Тебе́ неве́рный собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному/ соше́ствию Твоему́, Влады́ко.

Достойно есть:

Лик:
Досто́йно есть я́ко вои́стинну блажи́ти Тя Богоро́дицу, При́сноблаженную, и Пренепоро́чную, и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богородицу Тя велича́ем.
(И поклон един.)
Святы́й Бо́же, Святы́й Кре́пкий, Святы́й Безсме́ртный, помилуй нас.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник:
Я́ко Твое́ есть Ца́рство и си́ла и сла́ва, Отца́ и Сы́на и Святаго Ду́ха, ны́не и при́сно и во ве́ки веко́в.
Лик:
Ами́нь.

Кондак, глас 8:

Лик:
Со святы́ми упоко́й, Христе́, ду́ши раб Твои́х, / иде́же несть боле́знь, ни печа́ль, ни воздыха́ние, // но жизнь безконе́чная.
Чтец:
Го́споди, поми́луй.
(40 раз.)
И́же на вся́кое вре́мя и на вся́кий час, на небеси́ и на земли́ покланя́емый и сла́вимый Христе́ Бо́же, долготерпели́ве, многоми́лостиве, многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы, и испра́ви живо́т наш к за́поведем Твои́м: ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней. Огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры, и в ра́зум непристу́пныя Твоея́ сла́вы: я́ко благослове́н еси́ во ве́ки веко́в. Ами́нь.
Го́споди, поми́луй.
(Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
И́менем Госпо́дним благослови́, о́тче.
Священник:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Чтец:
Ами́нь.

Молитва:

Нескве́рная, Небла́зная, Нетле́нная, Пречи́стая, Чи́стая Де́во, Богоневе́сто Влады́чице, я́же Бо́га Сло́ва челове́ком пресла́вным Твои́м рождество́м соедини́вшая, и отри́нувшееся естество́ ро́да на́шего небе́сным совоку́пльшая, я́же ненаде́жных еди́на наде́жда и бори́мых по́моще, гото́вое заступле́ние к Тебе́ притека́ющих, и всех христиа́н прибе́жище: не гнуша́йся мене́ гре́шнаго, скве́рнаго, скве́рными по́мыслы, и словесы́, и дея́ньми всего́ себе́ непотре́бна сотво́рша, и ра́зумом ле́ности сласте́й жития́ раба́ бы́вша. Но я́ко человеколюби́ваго Бо́га Ма́ти, человеколю́бне умилосе́рдися о мне гре́шнем и блу́днем, и приими́ мое е́же от скве́рных усте́н приноси́мое Тебе́ моле́ние, и Твоего́ Сы́на, и на́шего Влады́ку и Го́спода, ма́тернее Твое́ дерзнове́ние употребля́ющи, моли́, да отве́рзет и мне человеколю́бныя утро́бы Своея́ бла́гости, и презре́в моя безчи́сленная прегреше́ния, обрати́т мя к покая́нию, и Своих за́поведей де́лателя иску́сна яви́т мя. И предста́ни мне при́сно, я́ко ми́лостивая и милосе́рдая, и благолюби́вая, в настоя́щем у́бо житии́ те́плая Предста́тельнице и Помо́щнице, сопроти́вных наше́ствия отгоня́ющи, и ко спасе́нию наставля́ющи мя: и во вре́мя исхо́да моего́ окая́нную мою́ ду́шу соблюда́ющи, и те́мныя зра́ки лука́вых бесо́в дале́че от нея́ отгоня́ющи, в страшный же день суда́ ве́чныя мя избавля́ющи му́ки, и неизрече́нныя сла́вы Твоего́ Сы́на и Бо́га на́шего, насле́дника мя показу́ющи. Ю́же и да улучу́, Влады́чице моя, Пресвята́я Богоро́дице, Твои́м хода́тайством и заступле́нием, благода́тию и человеколю́бием Единоро́днаго Сы́на Твоего́, Го́спода и Бо́га и Спа́са на́шего Иису́са Христа́: Ему́же подоба́ет вся́кая сла́ва, че́сть и поклоне́ние, со Безнача́льным Его Отце́м и Пресвяты́м и Благи́м и Животворя́щим Его Ду́хом, ны́не и при́сно и во ве́ки веко́в. Ами́нь.

Молитва ко Господу нашему Иисусу Христу, Антиоха монаха Панде́кта:

И даждь нам, Влады́ко, на сон гряду́щим, поко́й те́ла и души́: и сохрани́ нас от мра́чнаго сна грехо́внаго, и от вся́каго те́мнаго и нощна́го сладостра́стия, укроти́ стремле́ния страсте́й, угаси́ разжже́нныя стре́лы лука́ваго, я́же на ны льсти́вно дви́жимыя. Пло́ти на́шея воста́ния утоли́, и всякое земно́е и веще́ственное на́ше мудрова́ние успи́, и да́руй нам, Бо́же, бодр ум, целому́др по́мысл, се́рдце трезвя́щееся, сон лего́к, и вся́каго сатанина́ мечта́ния измене́н. Возста́ви же нас во вре́мя моли́твы утвержде́ны в за́поведех Твои́х, и память суде́б Твои́х в себе́ тве́рду иму́ща: всено́щное славосло́вие нам да́руй, во е́же пе́ти, и благослови́ти, и сла́вити пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Молитва иная, святаго Иоанникия:

Упова́ние мое́ Оте́ц, прибе́жище мое́ Сын, покро́в мой Дух Святы́й, Тро́ице Свята́я, сла́ва Тебе́.
Священник:
Сла́ва Тебе́, Христе́ Бо́же, Упова́ние наше, сла́ва Тебе́.
Лик:
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Го́споди, поми́луй.
(Трижды.)
Благослови́.
Священник:
Христо́с, И́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц наших, и всех святы́х, поми́лует и спасе́т нас, я́ко Благ и Человеколю́бец.
Лик:
Ами́нь.
Священник:
Благослови́те, отцы́ святи́и, прости́те ми гре́шному, ели́ка согреши́х сло́вом, де́лом, помышле́нием и все́ми мои́ми чу́вствы.
  
И отвещают людие:
Люди:
Бог прости́т ти, о́тче святы́й.
  
Священник же глаголет ектению:
Священник:
Помо́лимся о Вели́ком Господи́не и отце́ на́шем Святе́йшем Патриа́рхе (имя) и о Господи́не нашем Преосвяще́ннейшем епи́скопе (или: архиепи́скопе, или: митрополи́те, имя, егоже есть область).
Лик:
Го́споди, поми́луй.
Священник:
О Богохрани́мей стране́ на́шей, власте́х и во́инстве ея.
Лик:
Го́споди, поми́луй.
Священник:
О ненави́дящих и любящих нас.
Лик:
Го́споди, поми́луй.
Священник:
О ми́лующих и служа́щих нам.
Лик:
Го́споди, поми́луй.
Священник:
О запове́давших нам, недосто́йным, моли́тися о них.
Лик:
Го́споди, поми́луй.
Священник:
О избавле́нии плене́нных.
Лик:
Го́споди, поми́луй.
Священник:
О отше́дших отце́х и бра́тиях на́ших.
Лик:
Го́споди, поми́луй.
Священник:
О в мо́ри пла́вающих.
Лик:
Го́споди, поми́луй.
Священник:
О в не́мощех лежа́щих.
Лик:
Го́споди, поми́луй.
Священник:
Помо́лимся и о изоби́лии плодо́в земны́х.
Лик:
Го́споди, поми́луй.
Священник:
И о вся́кой души́ христиа́н правосла́вных.
Лик:
Го́споди, поми́луй.
Священник:
Ублажи́м правосла́вныя архиере́и и кти́торы свята́го хра́ма сего́.
Лик:
Го́споди, поми́луй.
Священник:
Роди́тели на́ша, и вся пре́жде отше́дшия отцы́ и бра́тию на́шу, зде лежа́щия и повсю́ду, правосла́вныя.
Лик:
Го́споди, поми́луй.
Священник:
Рцем и о себе́ саме́х.
Лик:
Го́споди, поми́луй.
(Трижды.)
Священник:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Лик:
Ами́нь.
  
По Уставу, по окончании 1-го часа совершается лития о усопших, которая, по мысли Типикона, является неотъемлемой частью утреннего богослужения. Заупокойная лития по окончании 1-го часа назначается Типиконом во все седмичные дни. В субботу, Неделю и в праздничные дни этой литии нет. Такая же лития назначается Уставом и после отпуста вечерни в том случае, если вечерня не соединяется с Литургией Преждеосвященных Даров, т. е. в понедельник, вторник и четверг.

Полезная информация о памяти святи́теля Кири́лла

Святитель Кирилл, архиепископ Иерусалимский родился около 315 года. Детство свое он провел в Иерусалиме, где получил прекрасное образование и был воспитан в строгом христианском благочестии. Достигнув совершеннолетия, святой Кирилл принял монашество и в 345 году был посвящен в сан пресвитера. Несколько лет святой Кирилл выполнял обязанности катехизатора, много и усердно проповедовал. В 350 году, после смерти архиепископа Иерусалимского Максима III (333–350), он стал его преемником на Иерусалимской кафедре.

В следующем году на праздник Пятидесятницы в Иерусалиме около 9 часов утра было чудесное знамение: на небе явился Честный Крест, сиявший несколько часов ослепительным светом. Начинаясь от Голгофы, он простирался до горы Елеонской. Святитель Кирилл сообщил об этом знамении императору арианину Констанцию (351–363), надеясь обратить его в Православие. Ревностной борьбой против ереси Ария святитель возбудил против себя арианствующих епископов. Один из них, Акакий, архиепископ Кесарийский, притязавший на церковную юрисдикцию над Иерусалимом, решил низложить святителя Кирилла. Когда в Иерусалиме наступил сильный голод, святитель Кирилл истратил все свое имущество в помощь страждущим. Так как голод не прекращался, святитель начал продавать церковные вещи, покупая на вырученные деньги пшеницу для голодающих. Враги святителя (а в их числе, кроме ариан, были еретики македоняне и манихеи) распустили слух, будто видели в городе женщину, плясавшую в священном облачении, которое ей продал торговец, купивший его у святителя Кирилла. Пользуясь этим слухом, еретики силой изгнали святителя в 357 году.

Святитель Кирилл нашел приют у епископа Силуана в Тарсе. В 359 году в Селевкии (в Сирии) собрался Поместный Собор, в котором участвовало около 150 епископов. Среди них был и святитель Кирилл. Акакий стал настаивать на удалении святителя Кирилла, но тщетно. Селевкийский Собор восстановил в правах святителя Кирилла. Тогда Акакий покинул Собор и в Константинополе перед императором Констанцием и Патриархомарианином Евдоксием (360–370) оклеветал Собор и святителя Кирилла. Император подверг святителя заточению.

Когда воцарился император Юлиан-Отступник (361–363), он под видом благочестия отменил все постановления Констанция. Святитель Кирилл вернулся к пастве. Через некоторое время Юлиан утвердился на престоле и открыто отрекся от Христа. Он позволил иудеям восстановить разрушенный римлянами Иерусалимский храм, выделив на это часть средств из государственной казны. Между тем святитель Кирилл предсказывал, что должны исполниться слова Спасителя о разорении самих камней храма (Лк. 21, 6). Однажды ночью произошло столь сильное землетрясение, что сдвинулись с места даже уцелевшие основания древнего Соломонова храма, а восстановленное незадолго до этого было полностью разрушено.

После этого святитель Кирилл вновь подвергся изгнанию, а его место занял святой Кириак. (Он был иудей и носил имя Иуда. Во время поисков святой царицей Еленой Честного и Животворящего Креста Господня он указал его сокрытое местонахождение. Уверовав во Спасителя после обретения Честного Креста, Иуда крестился и получил имя Кириак.) Но вскоре святой Кириак претерпел мученическую кончину (†363; память 28 октября).

После гибели императора Юлиана святитель Кирилл вернулся на кафедру, но в правление императора Валента (364–378) в третий раз подвергся ссылке. Лишь при святом благоверном царе Феодосии Великом (379–395) он окончательно вернулся к пастве. В 381 году святитель Кирилл участвовал во II Вселенском Соборе в Константинополе, осудившем ересь бывшего константинопольского епископа Македония и его последователей полуариан-духоборцев (Македонии считал Святого Духа тварным) и утвердившем Никео-Цареградский Символ веры.

Из творений святителя Кирилла особенно известны 23 поучения (18 огласительных для готовящихся принять Крещение и 5 для новокрещеных) и две беседы на Евангельские темы: «О расслабленном» и «О претворении воды в вино в Кане» (см.: J.P. Minge. Patrologia graeca, t.33).

В основе огласительных поучений лежит подробное разъяснение Символа веры. Святитель предлагал христианину выучить наизусть Символ веры , записать его «на скрижали сердца». «Члены веры, – учит святой Кирилл, – составлены не по человеческому измышлению; но из всего Писания собрано все важнейшее и таким образом составлено одно вероучение. Как горчичное семя в малом зерне заключает множество ветвей, так точно и вера в нескольких изречениях совмещает все учение благочестия Ветхого и Нового Завета».

Святитель Кирилл преставился ко Господу 18 марта 386 года.

Counter.Co.Kz: A free web-counter on any taste!
-->